孟子云，「人不可以無恥，無恥之恥，無恥矣！」講到無恥，前廉政專員湯顯明簡直就係人辦，佢唔止搞到廉署千年道行一朝喪，仲喺立法會帳目委員會上公然發假誓，作假證供，被踢爆後仲要死撐自己無錯。一個人嘅面皮可以厚到咁嘅程度，真係唔到你唔服！
檢討廉署制度嘅獨立委員會早前發表報告，列出貪湯十八宗罪，內容同佢喺帳委會作供有好大出入，懷疑有人畀假口供，可能涉及刑事罪行，帳委會當然不敢怠慢喇，於是日前第四度公審貪湯。點知貪湯果然夠晒無恥，面對立法會追殺，居然使出「詐唔知」、「扮失憶」、「賴下屬」等十大賤招，令人嘆為觀止。
最好笑嘅係，貪湯為求自保，竟然將瘋狂外訪嘅責任推晒畀對佢有「知遇之恩」嘅前特首曾蔭權爵士，話每次外訪都得到貪曾極速批准喎；而對廉署喺佢治下狂買茅台烈酒，就推說「唔知道」、「唔記得」；至於未經特首批准就喺出訪行程中加插參觀麗江古城等遊山玩水環節，佢就無賴到「玩地理」，話麗江亦係雲南一部分。佢仲話，自己就算有錯亦唔涉及誠信問題喎。
嗱，貪湯誠信有冇問題，唔係佢自己話事，而係由市民判斷。「東方報業民意調查」顯示，三成八受訪者批評貪湯諉過制度漏洞，逃避責任；亦有三成八直斥佢毫無悔意，難辭其咎；兩成人認為佢大話連篇，誠信破產。調查同時顯示，四成八指貪湯企圖推卸責任；三成認為佢作供不盡不實；一成七直斥佢帶人遊花園，浪費時間。
講到底，上樑不正下樑歪，貪湯厚顏無恥，死唔認錯，其實都係跟曾蔭權爵士學嘅咋。貪曾貪腐醜聞仲未了結，最近又同富商乘坐豪華郵輪，把臂同遊地中海，咁究竟反映乜嘢問題呢？三成四受訪者認為凸顯官商勾結、利益輸送等問題；三成一指貪曾做咗壞榜樣；兩成九指貪曾同富商關係千絲萬縷。講開又講，貪曾除咗貪婪，最近仲被踢爆為咗求見教宗，竟然同意大利政客進行「魔鬼交易」，涉嫌干預司法，簡直係罪加一等。
係人都知，經過貪曾七年之禍，港府烏煙瘴氣，腐爛不堪，加上香港正處於多事之秋，政改風暴一觸即發，隨時七國咁亂，究竟係撥亂反正，定係繼續墮落，視乎當局有冇決心斬妖除貪。可惜吖，「絕代雙貪」明明罪證確鑿，廉署調查居然拖拖拉拉，至今依然無聲無息，官官相護嘅嫌疑水洗唔清啦。四成二受訪者認為無法挽回廉署威信；兩成八指當局有法不依，有違公義；兩成六人形容調查雙貪如石沉大海，未符公眾期望。
總而言之，群眾眼睛係雪亮嘅，港產官僚唔好以為可以隻手遮天。家陣連內地都話要老虎蒼蠅一起打，港府究竟仲要拖到幾時吖？