末代港督彭定康左右手、回歸前做過港英政府中央政策組首席顧問嘅顧汝德，最近出書轟特區政府施政失誤，點名批評兩任前特首同多個政府高官，包括被指同地產商過從甚密嘅「貪曾」曾蔭權，話佢同董建華將土地控制權交咗畀地產界，不但主動放棄賣地，仲停建居屋同減建公屋，令私人市場不受控制，造就咗一群負擔唔起樓價租金嘅家庭。
顧汝德仲利用自己少許嘅剩餘價值，寫咗本名為《繁華底下的貧窮：香港施政失誤》嘅新書，引述○三年曾蔭權訪美時嘅一席話，當時係七一遊行之後，嗰時仲係政務司司長嘅曾蔭權唔知自己竟然有可能接替董建華做特首，喺美國發表講話時曾高度評價七一遊行，當時有兩名中國外交官都係座上客。佢咁講都好配合「劇情」嘅，因為貪曾發夢都估唔到，自己竟然有機會做到特首。顧汝德仲形容財政司司長曾俊華係「守財奴」，令好多長者被迫捱窮。