政情：陳智思瞓身做「星爸」
可持續發展委員會主席陳智思為咗推銷垃圾徵費，呢排密密出席公開場合，尋日仲獻出第一次，亮相《城市論壇》，不過就因為太瞓身落力，畀主持謝志峰笑佢太長氣！其實大家有無諗過，要落實垃圾徵費咁大件事，點解唔係由環境局局長黃錦星做，而係由陳智思擔大旗呢？有人就話，因為陳智思民望高，一於由佢嚟做黃錦星嘅「奶爸」，同「奶媽」政務司司長林鄭月娥齊齊幫「裙腳星」擋箭護航。
身兼行政會議成員嘅「公職王」陳智思，尋日原來係第一次上《城市論壇》，為嘅就係幫政府力銷垃圾徵費，仲落力到將三個收費方案、徵費水平、廚餘回收點做，甚至大型傢俬唔收錢等細節，滔滔不絕講出嚟，簡直好似成份諮詢文件背出嚟咁，連平時多嘢講嘅「哪吒」將軍澳區議員方國珊都要讓路，最後要謝志峰插嘴，先至順利去到廣告。之後謝志峰就笑陳智思，叫佢學吓兩分鐘之內將要講嘅嘢講晒，仲邀請佢多啲去論壇、熟習一吓時間控制添！
處女下海 出席論壇
尋日一身運動裝休閒打扮嘅陳智思就解釋話，論壇其實請過佢幾次，例如係講扶貧，不過扶貧政策好多人熟過佢，而且星期日係佢嘅家庭日，好多時都推晒工作陪屋企人，今次絕對係破例，為咗推銷垃圾徵費，乜嘢場合都出席，希望爭取市民支持。
咁陳智思對論壇嘅印象又如何呢？雖然陳智思答記者問題時，有維園阿伯拎住大聲公發表意見，蓋過晒陳智思把聲，不過陳智思就笑笑口話呢度嘅氣氛比佢想像中好，初時以為啲人講嘢好大聲，但其實都係理性討論。咁遲啲會唔會再嚟？陳智思就話，有需要就會再出場。
方國珊就好奇咁問，點解諮詢垃圾徵費咁重要嘅環保政策，仲要協調食物環境衞生署、康樂及文化事務署同路政署咁多個部門，環境局竟然完全失晒蹤，反而推畀陳智思嚟做，係咪因為佢民望夠高？N次傳陳智思有意選特首，陳智思又N次否認，今次粉墨登場，對佢嚟講唔知賺定蝕呢？