政情：卿姐 賴幸媛 舊同窗共歐遊
相識於微時嘅朋友永遠係最珍貴，能夠保住呢份情誼，一啲都唔簡單。民主黨主席劉慧卿縱橫政壇幾十年，原來同台灣陸委會前主委賴幸媛係同窗書友，兩人在八十年代初喺倫敦政治經濟學院（LSE）攻讀國際關係，最近卿姐難得飛去瑞士日內瓦參加聯合國會議，賴幸媛又係台灣駐世貿日內瓦總部嘅代表，兩人即刻結伴去咗意大利玩咗幾日，不知幾開心。
卿姐最近去日內瓦出席聯合國兒童權利委員會，促請聯合國檢視特區政府有冇違反《兒童權利公約》，一連開咗幾日會，最尾一日先有機會去阿爾卑斯山遊覽，不過卿姐強調自己同某啲官員好唔同，今次聯合國之旅全部自費，無用公帑一分一毫。
難得飛去歐洲，玩一日當然唔夠啦，所以卿姐話出發瑞士前，曾經喺意大利逗留咗四、五日，同相識三十年嘅賴幸媛結伴同遊，原來卿姐同賴幸媛識咗咁多年，呢個冷知識真係無乜人知。卿姐仲話，當年喺LSE讀書時仲透過賴幸媛認識讀法律系嘅民進黨前主席蔡英文，不過蔡英文係大師姐，唔算係同學。蔡英文有力問鼎下屆台灣總統，卿姐亦係一黨之首，證明LSE政治人才輩出。