中環出更：趙式慶耍洪拳 弘揚國粹
名流趙世光嘅孻仔趙式慶同博愛醫院前總理王嘉恩（Albert）都係武術發燒友，佢哋為咗弘揚國粹，四年前成立中華國術總會，旨在保存及延續中華武藝。然而經歷數個寒暑，論成績還是未如人意，於是佢哋決定改革呢個組織，除咗招攬才俊加盟，近來更連環出招，早前舉辦武術推介會，現場座無虛席。
會長王嘉恩話，中華武藝必須流傳於普羅大眾，中華國術總會於是決定改革，要將中華武藝普及化。而主席趙式慶就話，武藝並非拳腳功夫咁簡單，當中涉及中國人嘅養生之道、哲學思想等精神價值，內容豐厚，絕對係中國文化遺產之一。
習武未風行 周國豐憂慮
趙式慶又慨嘆，百多年前日本就明白武藝嘅文化意涵，繼而將佢哋嘅國粹競技化、制度化同專業化，從而推廣海外發揚光大，呢啲都係中華武藝歷來所缺。故此要弘揚國粹，就有必要構建國術體系。
熱愛武術而嚟撐場嘅朋友好多，同為「武癡」嘅社交界名人周國豐（Brandon）就話，本地習武之風淡薄，不及外國人咁熱衷，佢擔心長此下去，將來中國人習武可能要向洋人拜師學藝，所以當王嘉恩向佢招手，就義不容辭咁出掌副會長之職。而廖創興家族後人廖偉芬（Jennifer）就話，佢小學時代曾經修煉柔道，仲獲得「綠帶」嘅資格。有份出席推介會嘅家品店創辦人楊志超（Douglas）都對中國武藝有興趣，仲話有意將中國功夫傳統嘅剪裁注入現代元素咁話。
講番當晚嘅武術推介會，身為主角嘅趙式慶親自耍幾招洪拳招式，其硬橋硬馬、虎虎生風嘅架勢博得滿場掌聲。
卓妮