高科技產品通常吸引唔少粉絲引頸以待，一有新型號推出咯喎，通宵排隊又有，瘋狂炒賣又有，偷呃拐騙都有。高科技巨頭Google公司可能明年推出市面嘅Google Glass，相信會為全人類帶來一次嶄新嘅超凡體驗，少不免再次哄動全球。無他嘅，Google Glass集拍照、錄影以及傳訊等等多功能於一身，突破眼鏡嘅傳統形象，確係唔到粉絲唔期待。
勢估唔到嘅係，Google Glass嘅功臣之一竟然係香港嘅科技大學，根據科大電子及計算機工程學系講座教授郭海成嘅講法，呢一個係「科大成功香港失敗」嘅故事。功夫茶忽然諗到另一個故事，手術成功，病人死亡。
科大係點樣成功嘅呢？即係咁，研究團隊用咗五年時間研發微型電子顯示器，技術相當成熟，喺呢一個基礎之上，台灣公司Himax再發展出零點二五吋嘅微型顯示推動器，用於Google Glass之上。換言之，Google Glass得以成形，必須歸功於科大嘅研究。
講完科大嘅成功，當然要睇睇香港嘅失敗。故事回到研究團隊用咗五年時間研發微型電子顯示器，技術相當成熟，本來科大計劃將顯示器用於頭盔或者投影機顯示屏，可惜搵過唔少本港大集團同投資基金都冇人賞識，香港人擔心呢種高科技會蝕錢喎。頭頭碰着黑嘅研究團隊終於心灰意冷，把心一橫將技術轉讓畀台灣公司，結果創出Google Glass傳奇。
呢嗱嗱嗱，呢喂喂喂，呢家嘢咪叫做有眼無珠唔識貨囉，香港人走寶，香港人走雞，香港人走漏眼呀撞鬼！
科技大學近來最惹人注目嘅雖然係迎新營又玩淫亂遊戲，堂堂大學生再次衰鹹濕，之不過呢一間大學始終係臥虎藏龍，並唔係所有人都屬於高學歷而低智商。微型電子顯示器作為Google Glass嘅靈魂，簡直係鬼斧神工嘅殿堂級作品，少啲功力都辦唔到。問題係香港人始終有一個偏見，梗係認為Hi-tech揩嘢，Low-tech撈嘢，發展高科技就會蝕到阿媽都唔認得，反而生產山寨級數嘅低能貨色就會賺到盆滿缽滿。今次事實足以說明，Hi-tech係可以撈嘢o架！
講開又講，前朝曾蔭權政府除咗盛產貪腐官僚之外，仲有乜嘢特產呢？講到天花亂墜嘅六大產業到底搞成點呢？六大產業其中之一叫做創意產業，計功夫茶話齋，特區政府如果淨係得把口，唔急起直追，唔識得發展高科技，低能產業終有一日被淘汰o架！