政情：今日你上鏡：姚珏組樂團 扶掖後輩

每年都有年輕人從音樂學院畢業，但係能夠踏上台階一展身手就為數不多。為咗培植本地音樂人才，國際小提琴家姚珏早前就成立香港弦樂團，為有志以音樂為專業但又未獲職業樂團僱用嘅年輕人，提供繼續深造及演出機會，目前已有十一位成員。姚珏近日更邀請美國小提琴大師David Ehrlich來港，為成員進行十多天嘅密集式訓練，而弦樂團尋日傍晚更於港鐵香港站，向下班嘅途人送上悠揚樂韻。姚珏話，今次係樂團首次於公眾場所演出，往後仲會到訪不同社區舉辦音樂會，免費向坊眾演奏繞樑樂曲外，同時磨練樂團嘅技巧，可謂一舉兩得。