今年十．一唔放煙花，大家諗住物以罕為貴，出年農曆新年賀歲煙花嘅贊助實爭崩頭，但點知直到尋日接受贊助申請截止，康文署連一個贊助申請都收唔到，反而查詢嘅單位就好多，得個問字。有人分析話，由於明年十．一係建國六十五周年，好多愛國團體或親中組織都想留番啲「彈藥」贊助明年十．一煙花攞威，估計到時贊助嘅團體或組織肯定爭崩頭。
明年賀歲煙花喺新曆二月一日晚舉行，康文署上月邀請有興趣機構將申請書交畀煙花審核小組秘書，結果直到尋日截止日下午都未有人交表。康文署話，機構查詢完要時間整理，加上截止後都可以繼續交表，以往經驗顯示截止日無人交表都唔出奇喎。有人估計，依家啲愛國團體咁多，相信揼心口搵商家贊助賀歲煙花都唔係難事。
今年賀歲煙花由中華出入口商會（中出）同海南商會一齊夾咗約八百萬元贊助，中出會長莊成鑫尋日就話嗰八百萬元贊助得好抵，宣傳價值好高，但一問明年會否再贊助，莊會長就話：「返去傾吓先！」其實贊助十．一煙花嘅宣傳力同彰顯愛國心效果都比賀歲煙花高得多，但話晒都大嗱嗱幾百萬至千萬，難怪啲團體要算過度過嘅。