政情：大劉「霸道」 途人不滿
捲入澳門巨貪案嘅華人置業主席劉鑾雄（大劉），自早前喊驚話自己被逼到走投無路，猶如被強姦後，近日已經收晒口。尋日大劉同女友甘比、囡囡秀樺去灣仔富豪飯堂食晏時，依然對記者提問不瞅不睬。不過，大劉到達酒家時保安嘅「霸道」攔路陣勢，就惹來途人不滿，仲激嬲一名外籍男途人添！
繼續封口 走夾唔抖
尋日中午十二時半，甘比同囡囡先抵達飯堂，而大劉嘅座駕兩分鐘後才到達。保安知道大劉座駕就到時，使出一貫「封路」措施，先趕走泊喺門口嘅的士，連喺行人路上拖住個細路女行緊嘅女人都被保安催促行快啲。當大劉同秘書到達時，保安仲阻攔一個路經嘅外籍男人，等大劉可以冇遮冇擋直入酒家，都咪話唔「霸道」，搞到個外籍男人面燶燶，非常不滿。
大劉同甘比母女食咗大約一個鐘就離開，記者問大劉可唔可以回應吓澳門單巨貪案官司、佢係咪被人強搶地皮、係咪被人陷害等問題時，佢都拒絕回應，一支箭咁上車離開。