政情：議員渡海泳「鬥水」
維港渡海泳將於下月六日舉行，今年嘅報名人數創三年來新高，事關立法會議員都有六個報名參加。不過，呢幾位議員早前試水時就有人甩底，亦有人游得太慢達唔到參賽要求，甚至有人跣腳抽筋添，真係海軍鬥水兵，水鬥水。我哋就發現，主辦單位公布嘅參賽名單之中，幾位議員竟然榜上無名，唔通主辦單位驚班議員臨場落水唔掂檔失威，幫佢哋打定退堂鼓先？
報名參賽嘅六位議員包括體育、演藝、文化及出版界馬逢國、會計界梁繼昌、金融界吳亮星（星爺）、紡織及製衣界鍾國斌、勞工界鄧家彪同胡志偉就齊齊報名參加「唔計名次、志在參與」嘅優悠組。但奇就奇在喺大會網上公布嘅參賽者名單中，竟然冇佢哋啲名，反而政制及內地事務局政治助理陳岳鵬就榜上有名。
今年渡海泳參賽者要由鯉魚門三家村公眾碼頭游去鰂魚涌公園公眾碼頭，全程一千五百米，要喺七十五分鐘內完成，參賽者要先進行試水，合資格才能出賽。梁繼昌話，佢同鍾國斌試水時輕輕鬆鬆喺三十分鐘游完一千五百米，大家都達標，唔明點解會榜上無名，佢呢幾日仲特登安排操練，預咗到時游足全程。
被轉做嘉賓 費事瘀爆
至於當日試水剛好達標嘅馬逢國亦不明所以，但佢話自己成個暑假都周圍飛，唔係去探親就係參加交流團，無咩點練過水，到時都係志在參與。其餘三位議員試水唔達標，其中星爺就因唔小心跣腳而抽筋，搞到游慢咗；鄧家彪就咁啱因為囡囡氣管敏感入咗急症室而冇去試水。胡志偉就話當日因為太緊張而影響表現，搞到慢咗兩分鐘。
胡志偉講講吓仲透露咗玄機，佢話大會已經安排佢做下水禮嘉賓，到時佢落到水就唔會理咁多，一口氣游去鰂魚涌終點，佢仲話︰「我落到水唔通佢會撈得到我上嚟咩？」大家聽到嗎？原來六位議員被安排去做下水禮嘉賓，唔怪得參賽名單冇佢哋個名喇！
有知情人士就透露，其實有工作人員喺試水當日已同啲議員講，比賽時象徵式游幾吓就算喇，如果唔係隨時會抽筋咁話。睇嚟班議員都唔多被睇好，大會唔公布佢哋個名分分鐘都係錫住佢哋，費事萬一出事時就瘀爆啦！