「雙料議員」陳恒鑌（Ben）加入立法會一年多以來，向來好有諗頭，最近佢為咗慶祝結婚五周年同太太生日，就設計咗個特色泰國之旅。阿Ben喺社交網站上載咗一張自己戴帽同太太一齊煮飯仔嘅合照，原來佢喺泰國即席學煮泰菜畀驚喜太太。阿Ben話，太太一早話唔好送禮物，因為唔想佢嘥錢，所以佢就決定帶太太去泰國旅行兼學煮泰菜慶祝。
阿Ben話，泰菜係唯一有齊甜酸苦辣嘅菜式，又話今年係佢同太太人生嘅第一個五年，所以點都要過得有意義啲喎。結婚五周年就驚喜多多，咁會否對未來慶祝結婚紀念日帶來壓力呢？阿Ben充滿信心話，依家距離結婚十周年仲有一段時間，有機會可以慢慢再諗喎。不過，見到陳太喺合照中笑得咁燦爛，睇怕阿Ben做乜都係其次，只要肯陪伴喺身邊就甜到入心喇！
其實阿Ben結婚五年來都好似未去過旅行，結婚頭四年要應付連串選舉，當選議員後又因議會工作太忙而未能出行，搞到最後要帶太太同囡囡去迪士尼樂園玩「止渴」，今次泰國之行總算還住啲「利息」先。
卓妮