中環出更：黃志祥夫人買玩具氹孫
玩具陪伴小朋友成長嘅角色相當重要，好似信和置業主席黃志祥太太就對乖孫玩嘅玩具都好有要求，日前仲親自挑選合適嘅玩具。卓妮日前喺中環見到黃太行入玩具精品店，佢企喺塑膠玩具嘅貨架前精心挑選，揀揀吓仲索性踎低，逐一細心檢查過至買，最終揀咗幾款造型逼真嘅動物玩具。呢批玩具有恐龍又有蛇，啱男仔玩多啲，莫非真係買畀孫仔玩嘅？
卓妮當日食完晏途經太子大廈，一眼就認出黃太把曲髮。佢打扮樸素，一個人閒逛。當時佢挽住三、四個膠袋，仲有一把雨遮，但當日冇落雨，可能佢用嚟擋太陽都未定。
投其所好 買「恐龍」「青蛇」
黃太搭扶手電梯上到三樓，見到玩具店就一枝箭咁走入去，然後專注咁揀玩具。店內玩具款式多，有毛公仔又有Barbie，但黃太似乎對造型可愛嘅玩具冇乜興趣，反而向傳統嘅塑膠動物玩具打主意。
店內嘅玩具貨架分開一格格，黃太線視就一直往下移，佢愈睇愈落，之後仲踎低專注咁揀玩具。佢先睇中一隻啡色嘅恐龍仔，之後再揀多一條青色蛇，呢啲都唔係女仔所好，睇嚟係想送畀男仔玩。唔夠十分鐘，黃太已經揀到一手都係玩具去畀錢。問黃太係咪買玩具畀孫仔玩，佢就笑笑口話：「係呀，平時都會買！」仲話啱啱喺過去嘅中秋節同仔女、孫仔一齊過，認真溫馨。
卓妮