自從人類發明咗釀酒技術之後，呢個世界就變得好混亂，皆因酒後隨時亂性。中國史上最出名嗰個酒鬼叫做紂王，經過酒池肉林嘅薰陶，商朝腐敗過今時今日嘅中國官場，最低限度家陣嘅京老爺唔會亦唔敢再以炮烙之類嘅酷刑將百姓任意凌虐致死。可能係酒精中毒得太深入骨髓啩，紂王個老婆妲己會捉住一個大肚婆，活生生將佢個肚劏開，目的係睇下懷中之胎到底係男定係女。
既然酒乃穿腸毒物，所以當世人知道前廉政專員湯顯明竟然係一個貪圖杯中物嘅酒鬼，簡直嚇到一雙眼球跌咗落地，執番塞落眼眶都會左右不分。喂，廉政專員呢一個咁神聖嘅職責就好比古代嘅包青天，工作期間若然飲到醉醺醺，容乜易狗頭鍘殺錯良民o架？
被揭發酬酢不當等一連串貪腐醜聞以來，湯顯明自然受到高度關注。立法會政府帳目委員會第四度公審貪湯，面對發假誓作假證供嘅指控，呢個官場老油條不惜使出「十大賤招」迴避盤問，除咗扮失憶、詐唔知以及賴下屬等等慣常招數之外，佢更加將自己濫用公帑同埋瘋狂外訪嘅責任，全數推卸畀前特首曾蔭權爵士，佢話貪曾作為上司每次都極速審批外訪申請，而且從未要求佢提交補充資料或者喺外訪結束之後匯報成果。
好嘞，酬酢不當其中一個問題係廉署以烈酒奉客，情況到底係點嘅呢？帳委會昨日傳召廉署社區關係處處長穆斐文作供，根據穆處長嘅講法，廉署向來以紅酒同白酒宴請賓客，從來都未用過烈酒，所以當湯顯明話要買茅台嘅時候，社關處由於未買過，所以同事根本唔識得點樣買，亦唔知去邊度買，結果由專員下面嘅策略組負責購買，然後交畀社關處用於晚宴。穆斐文仲話，由於買酒未經事先批准，所以同事後來唔能夠報銷費用，要由專員簽名先至攞到錢。穆處長又承認，當日湯顯明帶隊訪問雲南麗江係「玩嘅成分居多」。
所以話啫，由一個酒鬼擔任廉政專員確係一件非常大鑊嘅事。喂，茅台作為一種烈酒係隨時會令人酒後亂性o架，貪湯主動話要買，而且積極配合入貨，然後簽名自己批准自己，咁同內地嘅貪官污吏公款吃喝有乜嘢分別呢？
古語有云，酒入愁腸愁更愁，之不過計功夫茶話齋，酒入官場醜更醜。
基本事實已經擺在眼前，貪湯亂性飲烈酒，一來浪費公帑，二來敗壞綱紀，好彩佢唔似得紂王咁有權任意殺人咋，否則香港死得人多！