立法會就快放完暑假復會，轄下各個委員會又要例牌選多次正、副主席。其實去年泛民主派同建制派本來想協調人選，但結果當然係唔成功啦，所以今年總共有五個委員會出現競爭場面，照計泛民一定唔夠建制派爭，除非建制派有內鬼啦。
五個委員會之中，又以財務委員會競爭最激烈，建制派決定按去年協議，派出金融界吳亮星取代飲食界張宇人出選主席，據聞建制派好齊心，唔再派其他人出戰。
至於泛民好大機會由民主黨主席劉慧卿角逐，但實際人選仍留待周五泛民飯盒會商討。幾年前卿姐曾經偷雞成功，擊敗建制派當選財委會主席，但係有建制派話呢支歌仔無得再唱喇，因為當年投畀卿姐嘅「內鬼」，如今已經唔再喺立法會喎。
另外四個委員會亦出現互撼局面，當中以司法事務委員會最誇張，建制派為確保梁美芬當選主席，一共有十九個人加入委員會，力壓十四名泛民議員。至於交通事務委員會、政制事務委員會及保安事務委員會方面，雖然都有競爭，但預料泛民贏面近乎零。