政情：小登科 黃進達不忘工作
康泰旅行社董事總經理黃進達（Jason）尋日小登科，同女友陳婷婷（Tania）結束八年愛情長跑，夜晚喺會展筵開百席大宴親朋。遊遍全世界嘅Jason，結婚不忘工作，廣發早前喺泰國同韓國拍攝嘅甜蜜婚紗照，以行動軟銷去外地搞婚禮係有幾咁正。
晒婚照軟銷海外婚禮
Jason話，自己籌備婚禮過程中，發現唔少準新人都嚮往有新鮮感同獨一無二嘅婚禮。但飛去外國行禮，人生路不熟，頭痛到極，所以佢月前就諗到為準新人提供一站式海外婚禮服務。佢大讚陽光與海灘嘅布吉，行禮最正，自己親身同太太示範對住藍天碧海擺甫士，仲騎住大象遊原始森林，果然有劇照效果，夠晒落力。
講番尋晚嘅世紀婚禮，數百名人到賀，新郎哥Jason致詞時感謝爸爸黃士心同媽媽嘅悉心栽培，自細教佢要刻苦耐勞，三更半夜捉佢起身家訓，培養佢長大後習慣咗超時工作。不過，黃士心就話Jason細個經常「百日哭」，搞到佢同太太無得瞓。答謝完父母，Jason就向新娘子Tania「沙冧」，話自己經常離港公幹，就連籌備婚禮都無時間，但Tania都無半句怨言，感謝太太嘅包容喎。