政情：申報收禮單長過長城

行會規定只要收受禮物嘅價值超過二千元，就要向行會申報。廖長城早於今年三、四月期間，收到五星級酒店送贈嘅生果籃同禮物籃等，已急急腳作出申報。

不理價值 註明捐作慈善

事隔約半年後，佢喺中秋節前夕，又收到合共九份形形色色嘅禮物，包括罐裝鮑魚、瑤柱、花菇、奇異果，三藩市特級甜櫻桃等，當然唔少得應節嘅雙黃白蓮蓉月餅同迷你金腿五仁月餅啦。

其中以罐裝鮑魚為例，我哋翻查資料顯示原價係三百八十元，合計兩罐係七百六十元，理論上都未超過申報禮物金額上限，但廖長城都唔理得禮物價值幾多，亦自言對於禮物價值多少都不詳，收到幾多禮就一併申報，並註明全數捐予「恩情護老中心」，係間有參加護養院宿位買位計劃機構。廖長城連串行動似乎反映，寧濫勿缺嘅申報作風開始抬頭，我哋曾致電廖求證，但未獲回覆。

其實早前喺港府公布政治委任官員涉及潛在利益衝突的新指引，首次訂明「私人利益」的定義涵蓋家人、親屬、私交好友及曾經「欠下人情」嘅人後，已有政治委任官員，尤其係副局長同政治助理，早已預言申報較以往複雜，所以據聞佢哋私底下交流後有兩個做法，一係乜禮物都婉拒唔收，一係就收到乜禮物都全部申報。

保障自己 免出事先補鑊

話時話，副局政助呢個謹慎態度講到尾都係想保障自己，但對於公務員嚟講，大量嘅申報或多少增加佢哋工作量。不過，為免出事時先「補鑊」，寧濫勿缺都係對付利益衝突嘅暫時出路，睇嚟大家都要互相忍讓吓喇。