政情：中環出更：大劉熱天穿黑褸 又有玄機？
捲入澳門巨貪案嘅華人置業主席劉鑾雄（大劉），早前連番向傳媒「爆大鑊」，一時話自己由細就嚇到大，揚言「預咗被人喺街亂刀斬死」，但一時又話有人陷害佢、屈佢、被人霸住財產，同時又喊驚話自己被逼到走投無路，猶如被強姦。不過，自從佢爆大鑊後，呢幾日去灣仔富豪飯堂開餐時就收晒口，尋日都唔例外，對記者嘅任何提問都好似聽唔到咁。
全身都黑 頭耷耷入酒家
尋日中午十二點鐘左右，照樣有三個保安已經喺酒樓門外準備恭候大劉，三十五分鐘後大劉同秘書終於現身。雖然天氣好熱，但大劉就全身黑色打扮，仲着住件黑色外套，真係睇見都覺得熱。
問佢可唔可以再講吓澳門單巨貪案？但佢充耳不聞，頭耷耷急步行入酒家。
直到兩點鐘左右，大劉終於食完飯離開，但佢就無好似日前咁無喇喇跣腳差啲仆親，聽到「係咪被強搶地皮」嘅提問亦無再好似前日咁打噴嚏，總之對記者嘅提問一概無回應，然後同秘書匆匆登上座駕離開。
卓妮