政情：中環出更：密會慢必何建宗惹聯想
發展局前政治助理何建宗兩個月前被揭未有向政府申報其家族公司持有新界古洞逾兩萬呎地皮，佢於是一日內閃電辭職問責，成為梁班子中第一個離職嘅政治助理。不過，何建宗辭任政助後，似乎未如外界所料幫手打理家族生意，而係不斷搵昔日好友出來歎tea打牙骹，咁啱前日卓妮就見佢同人民力量陳志全（慢必）密會。
前日下晝兩點半鐘，卓妮去金鐘一間酒店Coffee shop歎下午茶時，發現何建宗同慢必坐喺一個偏僻嘅角落，期間傾到雞啄唔斷，何建宗仲不時指手畫腳，而慢必就不時點頭回應。二人傾咗一個多鐘頭後，慢必就找數離開，並一齊入咗男洗手間，但之後眨吓眼就唔見咗人喇，可能係搭升降機離開酒店。
為家族產品搵代言人?
據講何建宗同慢必當年係中大社會學系嘅同學，但就未聽過慢必話同佢好熟，忽然間約慢必出來敍舊，究竟所為何事呢？我哋就呢件事問過慢必，佢話大家多年來都無乜聯絡，但幾個星期前，何建宗主動約佢見面，當時佢都有少少驚訝，但都爽快應承。
至於兩人當時傾緊咩，慢必就三緘其口，只係話當日係朋友敍舊，總之天南地北乜都傾一餐。
究竟何建宗離開政府呢個熱廚房後有乜新搞作呢？莫非搵慢必做家族公司旗下產品嘅代言人？殺蟲水定係神油呢？
卓妮