不經不覺，時光飛逝，內地開放香港個人遊已經十年嘞。十年生死兩茫茫，○三年沙士瘟疫殺咗二百九十九人之後，為咗刺激經濟而推出嘅個人遊計劃，雖然對香港帶來唔少好處，不過壞處都唔可以話少o架，如果唔係都唔會出現日益尖銳嘅中港矛盾啦。簡單咁講，香港有限嘅配套設施冇能力應付絡繹於途嘅南下大軍，尤其水貨客搶購奶粉之類嘅瘋狂行為更加令到本地居民心生厭惡，「光復上水」嘅趕客活動應運而生。
為咗唔想十三億人民都有資格來港個人遊，從而踩到只有一千一百平方公里面積嘅香港陸沉，中港兩地嘅協議係局部開放，目前有四十九個城市能夠來港個人遊，其他地方嘅老百姓來港觀光唔係話唔得，條件係必須參加旅行團咁解，團友要遵從「隨團來、隨團去」嘅原則。將個人遊同旅行團分開處理，入境管制以及數據統計都比較容易控制。
之不過問題係，中國人腦筋好鬼死靈活o架，尤其係走法律罅嘅本領特別高強。呢，內地有見錢開眼嘅旅行社吼準所謂旅行團冇人數限制嘅灰色地帶，居然推出「一人旅行團」，容許原本冇資格以個人遊身份來港嘅國內同胞，以「變種個人遊」嘅方式入境。走法律罅嘅具體方法其實簡單到唔簡單，你只要喺戶籍所在地取得俗稱L簽嘅團隊旅遊簽注，再去到邊境口岸搵到願意提供報團證明嘅旅行社，交低大約五十元人仔，一個人就可以成為一個旅行團，過關來港之後自由自在海闊天空。當然啦，變種個人遊嘅主要目的唔一定係觀光購物吃喝玩樂o架，可以做黑工，可以去賣淫，甚至乎揸兜乞食都得。
變種個人遊嘅出現，等於全中國人民都有可能自出自入。香港會唔會被踩到陸沉？最好請教一下地理專家，望就望地基夠硬頂得順啦。
嗱嗱嗱，即係咁，功夫茶絕對唔鼓吹中港矛盾，更加唔希望血濃於水嘅炎黃子孫以「你係蝗蟲我係狗」嘅八婆方式互相謾罵，不過香港始終真係資源有限，確係難以承受千千萬萬國產遊客嘅沉重負擔。所以計功夫茶話齋，特區政府有必要動動腦筋，唔可以太被動任得內地官僚審批放行。冇錯，香港官老爺冇權過問偉大祖國嘅旅遊簽注批畀邊個唔批畀邊個，不過若然要求中央政府硬性規定旅行團人數下限，杜絕一人旅行團自出自入，其實都唔係好過分啫，吓話？
聽話啦，港產官僚平時係就係無能，施政烏龍百出，甩甩漏漏，但係對於陸沉嘅危機唔可以坐視不理o架，快快同京老爺從長計議啦！