香港教育工作者聯會（教聯會）今年底將舉行換屆選舉。據聞自九十年代開始出任教聯會會長嘅楊耀忠，決定退下火線改任榮譽會長，標誌着楊耀忠領導近四分一世紀嘅教聯會，將會正式改朝換代。
消息指，今次係楊耀忠主動向領導層表示希望退位讓賢，佢又曾向身邊人講笑話「自己落車好過被人逼落車」喎。至於佢嘅接班人仍在醞釀中，暫未有定案。
不過，咪以為楊耀忠退任會長在即，教聯會發展就會停落嚟。據聞佢哋喺會址劃咗個一千呎嘅地方，同有心人合作搞類似教協嘅超級市場，售賣平價食品同文具等，試行一個月後將檢討成效。
另外，教聯會轄下國民教育服務中心去年因出版《中國模式國情專題教學手冊》掀起連串國教風波。中心會址已於今年六月底租約期滿，教育局決定重新招標，據聞教聯會再三考慮後不會再參與投標，決定縮小規模喺教聯會總部內進行國教宣傳，有需要才向學校租借較大場地，換言之今後未必會再有以往嘅國教日營喇。