早前我哋率先報道過，繼紀律部隊首長同常任秘書長之後，一眾副局長及政治助理嚟緊都會組團訪京。尋日政府公布有關訪京行程同人腳，由下周二（廿四日）啟程，為期五日，除咗北京仲會去湖北，參加研修課程同考察，但最特別係忽然多咗個政制及內地事務局局長譚志源（Raymond）隨行，唔通佢想假借陪副局政助訪京之名，秘密向中央匯報香港政改嘅最新發展？非也，原來佢此行係為咗「打救」呢個群龍無首嘅訪京團，等佢哋有機會見到較高級嘅中央官員。
過往副局政助訪京一般由特首辦主任帶隊，但由於特首辦主任邱騰華咁啱要喺嗰段時間陪特首梁振英外訪，令副局政助無咗個團長，最後惟有互選出較資深嘅運輸及房屋局副局長邱誠武暫代有關職務。
須知內地官場一向好講究官階對等，香港嘅副局政助，喺內地嚟講只係低級官員，好難見到港澳辦主任等正部級京官，因此本身做過副局同特首辦主任嘅Raymond，就決定隨團出訪參與首兩日喺北京嘅行程，等班團友見北大人時唔會太失禮。
隨着Raymond出訪，佢嘅副手政制及內地事務局副局長劉江華，就被迫留番喺香港署任局長職務。不過，當Raymond廿五號返港後，劉江華又會立即出訪瑞士日內瓦，代表港府出席聯合國兒童權利公約委員會會議，大家都有得飛吓。