政情：議員大花筒 物證如山
立法會議員除咗每個月有八萬多元人工收，每逢買辦公室文儀用具，甚至枱櫈都可獲公帑開數，但當佢哋唔能夠連任，就要將呢批物品歸還畀立法會，公開畀新一屆議員同秘書處職員競投。我哋發現，上屆立法會唔少議員都大花筒「洗腳唔抹腳」，買電腦影音產品唔在講，更有議員豪花兩萬多元買一張皮櫈，唔通坐完腰骨會直啲？有議員甚至連打字機都買，納稅人啲錢真係使得冤枉。
購專業打印機無厘頭
立法會尋日公布，上屆離任議員需要交出嘅物品，一共有三百九十四項，呢幾百項物品真係「要幾趣、有幾趣」。大家估吓一個議員辦公室究竟有啲咩用公帑買？座枱電腦、手提電腦等硬件設備當然唔少得啦，咁多間議員辦公室總共有成百部電腦咁多。而打印機就成為最貴嘅項目，唔少議員一買就買部兩、三萬元嘅專業級打印機，其中一部仲要約四萬六千元，有咩文件要印得咁專業呢？唔通佢哋兼職開影印舖？
至於其他物品真係千奇百怪，例如有位好識歎嘅議員就大拿拿用兩萬多元買咗張皮櫈，相反其他議員買嘅櫈都係好平，例如一張高背大班椅都只係千五元，究竟呢張兩萬元「天價椅」有咩功能，真係得嗰位議員至知。亦有議員用咗一萬二千元買個儲物櫃，到底用咩物料做咁巴閉呢？
不過，最好笑都係有議員連屬「古董」級數嘅打字機都買，雖然只係千多元，但有冇咁嘅需要呢？另有議員用咗七千多元購買工業級嘅大型裁紙機，如果唔講，分分鐘以為佢開工廠添。
發電機「涼亭」乜都有
沒有更奇怪，只有更奇怪。有議員用四千多元買咗部發電機，甚至有人用六千元買咗個「輕便式活動涼亭」，一睇就知係議員做地區活動時嘅設備，呢啲工具又點算係辦公室開支呢？至於其他物品，包括空氣淨化機、抽濕機、吸塵機、飲水機等都有議員買。雖然佢哋冇得帶走呢啲物品，但物品始終係有折舊嘅，尤其電子產品，結果依家要賤賣，究竟散到幾多倉底貨，相信秘書長陳維安幾苦惱。