中環出更:男拔論壇「被佔中」 翟紹唐解圍

早前協恩中學搞咗個「佔領中環」論壇,搞到唔少家長鬼殺咁嘈話教壞小朋友。拔萃男書院就醒目得多,尋日低調搞咗場「宗教與政治」論壇,雖然題目無講明佔中,但請來三位校友嘉賓,就分別係佔中發起人戴耀廷、監警會主席翟紹唐同立法會議員田北辰(田二少)。試問咁嘅格局,又點會唔講佔中?不過,班學生似乎興趣唔大,就算台上唇槍舌劍,台下依然有學生瞓覺搵周公,仲叫極都唔醒。

負責做主持嘅翟紹唐,一開始已講明唔會討論佔中,反而問在場嘅戴耀廷同田二少,宗教信仰同佢哋從政有冇關係。不過,要戴耀廷唔講佔中都幾難,佢於是搬個神出來,話係神要佢搞埋佔中呢啲咁激嘅行動喎,又話用過所有方法爭取普選都唔得,惟有搞公民抗命。做反方嘅田二少就反駁話,普選解決唔到所有問題,就算有普選特首都有民生、房屋等問題,所以最重要係人,而唔係制度。

學生悶到瞓着

兩人你一言、我一語,唔知係咪班師弟嫌佢哋太悶,現場所見除咗啲高年班學生聽得比較入神外,低年班學生差唔多全部「陣亡」,未夠半個鐘已經有大半人瞓着咗。有老師仲即場捉走兩件叫極都唔醒嘅學生去「照肺」,認真慘情。

差唔多去到論壇尾聲,有男拔校友就建議不如嚟個現場調查,睇吓支持同反對佔中嘅學生邊方多啲。有得舉手表態,班拔萃仔即時醒晒,但心水清嘅翟紹唐就好醒目,即時將題目轉為「對佔中有睇法就舉手」,結果在場七成學生都舉手。由於唔知班學生支持定反對,校方就唔使咁尷尬,翟紹唐呢招都算高明喇。

卓妮

第一手消息請下載on.cc東方互動iPhone/iPad/Android/Windows Phone Apps