立法會即將復會，經過兩個月暑假周遊列國，又唔使開會困獸鬥，唔少議員都心廣體胖。好似廠商會代表林大輝咁，佢自爆呢個暑假先去內地玩，然後又去歐遊，食又食得多，運動又做少咗，搞到體重差一磅就達二百磅大關。好彩大輝唔止愛食肉，仲熱愛體育，現時每星期最少踢兩次波，相信好快就可以變回當弗身形。
原來大輝讀書時期一直係「瘦底」，維持百二磅左右。但自從入廠商會後應酬多多，體重先直線上升。不過，體重對男人嚟講其實好小事，反而事業先係重點。一早表態有意直選嘅大輝，到底幾時先決定玩唔玩直選，大輝就話要睇好多因素，例如到底下屆立法會選舉會劃五區定六區，因為佢無黨無派，如果每區議席唔多，對佢都唔係太有利。至於佢會唔會以政黨身份參選，大輝就承認自由黨田北俊（田少）的確有搵佢加盟，但自己仲諗緊，現時未有定案住。