政情：政黨爭做跨境童代言人
二○一六年立法會選舉會否新增新界北選區依家仲係言之尚早，不過部分位處北區嘅議題歷久常新，提早惹來各大政黨政團爭相關注。其中走得最前嘅係民建聯（民記）北區區議員劉國勳同民主黨（白鴿黨）總幹事林卓廷，二人最近就長做長有嘅跨境學童問題連番過招，加上以范國威為首嘅新民主同盟亦銳意打入北區，上述三方未來料會圍住個北區氹氹轉，更多隔空過招將在所難免。
同日舉行記者會
港府近年多項「棘手」政策都同北區息息相關，年初有「限奶令」，最近又有新界東北發展計劃，認真係鑊鑊新鮮。不過講到長做長有嘅議題，其中一個必定係跨境學童問題，因為今年北區小學學額不足，當局提出「返回機制」應對，最近更觸發民記同白鴿黨短兵相接搶議題發聲。
話說民記同白鴿黨早前前後腳約見教育局官員講跨境學童問題，前者早一日約到當局去傾跨境專網，不過疑似「捉蟲」只發新聞稿，搞到遲一日先同當局會面嘅白鴿黨執番身彩，咁啱得咁蹺同民記同日舉行記者會。不過民記最後搵到教育局局長吳克儉出席佢哋有份舉辦嘅座談會，正式宣布跨境專網詳情，總算喺最後關頭拎返個尾彩。
劉國勳撼林卓廷
對於喺跨境學童呢個議題同白鴿黨短兵相接，劉國勳強調最緊要係解決問題，又自言佢哋早於三、四年前已提出跨境分流政策，相信其他招數只係屬於輔助性質。至於最近不時以廉政公署前調查主任身份現身嘅林卓廷，其實亦靜靜起革命關注北區議題，最近仲出任該黨教育副發言人，似乎有意喺跨境學童等教育議題同民記長期抗爭。除此以外，明顯想染指北區嘅仲有新民主同盟，只要係涉及中港嘅議題，佢哋幾乎都會沾手，認真不可低估佢哋一舉一動嘅政治訊息。
大家都知道，跨境學童呢個問題每年九月新學年前夕都會係外界焦點，民記、白鴿黨同新民主同盟提早部署同做好準備工作實屬無可厚非，但議題擺在眼前，邊個可以脫穎而出成為疑似「代言人」，就要睇吓邊個政黨政團比較有諗頭同對呢個範疇較有研究喇！