消防處有一個崗位叫做先遣急救員，大家估下佢哋嘅主要作用係乜吖嗱？答案唔係先遣，亦唔係急救，而係捱鬧。根據消防處救護員會總幹事屈奇安嘅講法，先遣急救員只接受過一星期課堂訓練，冇接受全面輔助醫療訓練，救援消防車只提供氧氣、心臟除顫器以及紗布繃帶等等簡單器材，當遇到複雜個案就無法處理。屈奇安透露，曾經有先遣急救員吐苦水，話佢哋做唔到好多急救程序，趕到現場嘅作用係「有個人喺度畀人鬧，鬧到救護車嚟為止」。
好嘞，假如閣下唔好彩遇到緊急狀況必須打九九九要求幫忙，最先到達現場嘅只係受過基本訓練嘅先遣急救員，救護車要十五分鐘先至姍姍來遲，你會有乜嘢感想吖嗱？正所謂咯喎，急驚風遇上慢郎中，你可能激到七竅生煙。
非常不幸地，兩歲半男童梁逸晨嘅遭遇就係咁。逸晨同家人住喺屯門富泰邨，九月三日晚上開始發燒，後來情況轉差並且抽筋。家人於上午七時零五分致電九九九，最早到達嘅只係先遣急救員，等到救護車最終將逸晨送到屯門醫院急症室，距離召喚已經過咗三十六分鐘。簡單咁講，白車來得遲，送院送得慢。
急驚風遇上慢郎中嘅後果就悽慘嘞，逸晨父母質疑急症室未有即時注射強效藥物，兒子一直抽筋不止，一小時之後先至轉送兒科深切治療部（PICU）。由於腦部曾經缺氧，逸晨有機會變成植物人，以後或者無法甦醒。憂心如焚嘅父母當然據理力爭啦，佢哋要求院方同消防處交代有冇延誤救治。
喂喂喂，苦主唔係無理取鬧o架，正如逸晨爸爸梁先生話齋，兒子併發腦水腫，隨時有性命危險，佢質疑院方：「如果急症室打第一針唔得，點解唔即刻轉去PICU用更強嘅藥？」
講真吖，香港人脾氣算好o架喇，若然類似事件發生於其他地方，慢吞吞嘅消防部隊唔止捱鬧咁簡單。好似台灣台中市霧峰區咁吖，當地深夜發生火警，火勢懷疑從傢俬行後方空地竄出，傢俬行老闆不滿消防隊員救火動作太慢，兩父子同對方先而口角繼而動武，激戰兩派各有兩人打到鼻青臉腫。
正如屈奇安話齋，救護車需時十五分鐘到現場，反映救護員人手嚴重不足，難以應付市民需求，消防處應該投放資源喺救護服務，唔應該只着眼於先遣急救員訓練。
嗱，唔該消防處以及屯門醫院真係好好向逸晨家人交代清楚，更加有必要想盡辦法唔好令佢變成植物人，否則咯喎，準備萬箭穿心啦！