政情：鄭耀棠影衰工記
香港迪士尼樂園去年萬聖節期間，一口氣邀請咗十六名負責監察政府運作嘅立法會議員體驗「黑色世界」玩鬼屋。但自從部分議員豪遊法國嘅風波曝光後，無論議員抑或迪士尼園方「見過鬼都怕黑」，迪士尼今年更決定取消邀請議員試玩哈囉喂活動，相信實令唔少貪玩嘅議員失望。不過，工聯會出身嘅郭偉強就冇有怕，皆因工聯會「阿姐」陳婉嫻早就教落，接受得公職就唔好貪小便宜，因此去年都冇應邀去迪士尼，寧願自掏荷包去玩。
郭偉強守「家訓」拒收禮
郭偉強向我哋透露，當年大學畢業後加入工聯會做議員助理，從政多年嘅陳婉嫻當時已經向佢哋教路，話做得工會就唔應該同商業機構「行得太埋」以避嫌，所以工聯會一直都維持純樸風氣。直至郭偉強○七年當選東區區議員，依然謹記嫻姐教誨，好似佢選區嘅和富最多福建人。佢哋都好客氣，不時有街坊向佢送茶葉、西餅咁，但郭偉強都堅持唔收，就算街坊夾硬擺低，佢都會轉贈畀老人院或者幫佢手嘅義工，總之理直氣壯，免得招人話柄。
郭偉強早前跟隨立法會內務委員會轄下扶貧小組委員會飛赴台灣、日本考察，原來隨團議員連食飯都協議好，唔畀「飯照」喺社交網站流出，以免影響市民觀感，以為佢哋以考察為名，吃喝玩樂為實。總之樣樣謹慎啲，咪唔會招人話柄囉。
偕妻豪遊法 做壞榜樣
嫻姐教得咁好，不過唔係人人都明白唔貪小便宜嘅重要性。身兼行政會議成員嘅鄭耀棠偕妻豪遊法國返港後死唔認錯，到咗其他議員「回水」謝罪，佢都無動於衷。早前就有讀者以工聯會「一群會員」名義發表公開信，狠批鄭耀棠接受款待厚顏無恥，更唔滿意佢唔顧自己身份都要顧工聯會形象喎！
唔通工聯會嘅「家訓」只適用於需要經歷選舉洗禮嘅民選議員，獲政府欽點入局嘅鄭耀棠就可以打橫嚟行？正所謂「上樑不正下樑歪」，睇嚟鄭耀棠要時刻記住以身作則，唔好要班後輩吓吓幫你頂先得o架！