中環出更：估選舉得票 黃春平有一手
澳門立法會選舉剛結束，部分候選人都話選舉結果同佢哋嘅預計有偏差。喺香港，原來身兼創建力量秘書長嘅觀塘區議員黃春平係估票能手，佢喺上屆區議會選舉，點票階段就估到自己贏約六百票，結果贏咗八百多票。之後到陳俊傑參加坪石區補選時，實際得票數目同估計嗰個數，只差廿票咋。
做家訪多留意市民態度
咁厲害，黃春平話全靠平時勤做地區工作同家訪。因為多同居民接觸，就可以知道自己嘅認受性。例如居民接過傳單後立即留意內容，就證明佢哋肯畀機會你做事。做家訪時，若一家五口只有兩位成員對你特別熱情，即係代表喺嗰度只得兩票。
面對街坊咁叻，點解對住記者就咁閃縮，好似上年走後門避記者呢？黃春平就大叫冤枉，因為當時係民政事務署嘅秘書多次叫佢走後門，為免難為職員，咪走另一出口。之後佢被指搶咪，就因為當時有電視台記者嘅咪線繞住佢個袋，所以攞起個咪都只係想繞返開條線啫。真係唔知民政署嗰時係幫佢還是害佢囉！
卓妮