中環出更：訪正生 郭炳聯攀山涉水送禮
後日就係中秋，新地聯席董事郭炳聯尋日山長水遠去咗芝麻灣基督教正生書院，送上中秋禮物，亦表達敬師嘅心意。月前郭炳聯以「郭得勝基金」名義開展咗「陽光計劃」，幫助正生書院全面發展。尋日佢同員工再度到訪該院大派禮物，仲同校長陳兆焯及師生分享感受。
尋日烈日當空，一身便服加皮鞋嘅郭炳聯同員工唔怕辛苦，落船後汗流浹背走過長長斜路，行咗十分鐘，仲帶埋手提電腦、打印機同太太買嘅月餅到該院，又送咗蜜糖畀老師潤喉。佢哋參觀咗修葺中嘅學生宿舍，了解工程進度，郭炳聯盛讚學生掃漆功夫了得，笑言「可以去新地幫手，賺人生第一筆錢」。郭炳聯又話，唔少人都將注意力放喺學生身上，其實老師都好值得表揚，事關佢哋同學生一齊住，四季都係沖凍水涼，仲要隨時候命，少啲毅力都唔得。
父以身作則 遇困不退縮
郭炳聯同師生分享時話，好老師會改變學生一生，佢爸爸就時常以身作則教導佢哋處世嘅道理。佢話，爸爸無論工作幾忙，放工都盡量返屋企一家人食飯，趁機向佢哋分享人生經驗。佢憶述，爸爸經常以身作則教導佢哋，無論面對幾多困難，都從來不埋怨同退縮，堅持一份鬥心同意志力去克服困難。佢又透露，佢爸爸喺醫院嘅最後一刻，都堅持要工作。
據悉，「陽光計劃」現正協助修葺及美化該院舍，新地並將聘用該院畢業生，未來仲會與另一間機構合作幫助邊緣青年。早前傳聞有善心人捐隻船畀該院，陳兆焯回應話，計劃已經石沉大海，現仍為交通問題煩惱。
卓妮