月到中秋分外明，中秋一到心驚驚，點解咁講呢？因為農曆八月十五中秋節嘅傳統食品係月餅，而食月餅其實有相當多嘅潛在問題，確係令人驚到心肝仔卜卜跳o架。
第一個潛在問題係月餅屬於「三高食品」，即係高糖、高脂肪以及高熱量，一日食一個月餅膽固醇已經超標四倍。
第二個潛在問題係浪費率高，食剩嘅月餅數量非常可觀。環保團體綠色力量調查發現，舊年每個家庭平均丟棄四分之三個月餅，推算全港有一百七十九萬個月餅被丟棄，若然一個接一個連起，長度足以疊成一百四十八座環球貿易廣場。
至於第三個潛在問題咯喎，牽涉到人類最關心嘅一個核心課題：黑心食品。
香港海關最近破獲一宗兜售冒牌月餅案，執法人員喺元朗一間美容院檢獲一百三十五盒總值約二萬元嘅冒牌雙黃白蓮蓉月餅，所冒充嘅牌子喺本港大名鼎鼎。海關拘捕美容院一名女負責人，有人涉嫌魚目混珠向熟客兜售冒牌月餅，每盒售價較正貨便宜約八十元。但凡冒牌貨當然質量較差啦，假月餅嘅蛋黃明顯較正貨細同乾。相對之下冇咁黑心嘅係，相信由內地進口嘅冒牌月餅不含有害物質，而且估計流出市面數量不足十盒。
你知啦，中國係一個山寨強國，幾乎乜都可以造假，既然今次破獲一宗由內地進口嘅冒牌月餅案，會唔會仲有其他漏網之魚o架？所以功夫茶促請港產官僚打醒十二分精神，海關又好，警方又好，食環署都好，必須切實做好把關工作，絕對唔可以任由中國製造嘅黑心食品攻陷城池。
冇耐之前喎，福建發生一件嚇破膽嘅事，福州有人喺屋企發現一個存放已經八年嘅「萬年月餅」，外觀完好如初兼且油亮發光。存放八年點解仍然冇穿冇爛冇發霉嘅呢？外界質疑月餅生產商為咗延長保質期，非法添加過量防腐劑，危害民眾健康，簡直係食死人冇命賠呀，老友！
如果話月餅係「三高食品」，咁炎黃子孫就係「兩多民族」，第一多係貪官，第二多係奸商。國產黑心食品之所以氾濫成災，無非就係因為貪官包庇奸商，官商勾結禍國殃民，卒之搞到民以食為天嘅中華民族食不安心。中國人三十年來脫貧致富，由以前皮黃骨瘦嘅東亞病夫，兜一個大圈變成肚滿腸肥嘅東亞病夫，你都咪話唔諷刺。
中秋小心食月餅，慎防奸商攞你命。功夫茶除咗促請港產官僚做好把關工作，同時亦呼籲國家領導人，月餅八年不腐就話唔好啫，中國官場最理想係徹底防腐，咁先至能夠確保同胞唔會食物中毒！