政情：雷鼎鳴支持科大家長日
香港科技大學月底將首次舉辦家長日，校長陳繁昌仲出通告連「回條」，邀請家長回覆係咪出席，差在未使家長簽名，引發一眾大學生同舊生議論紛紛。不過，該校商學院副院長雷鼎鳴就相當支持校方搞家長日，仲反諷力圖阻止家長出席嘅大學生先係「小學雞」添！
叫大學生咪「小學雞」
唔少大學生擔心家長「入侵」校園令大學「小學化」，雷教授解釋，唔少美國著名大學都會舉辦家長日，當地學生亦相當重視呢個親子機會，科大只係跟隨呢套制度，唔明白本地學生點解咁驚「見家長」，笑言「大家唔好將童年陰影帶到上大學」，而家長日正正就係畀家長同仔女講聲「再見」，未來四年放心將個仔交託畀校方，唔使日掛夜掛。
雷教授仲透露，科大喺轉制第二年先搞家長日，係鑑於上年好多家長唔放心仔女喺學校嘅生活，成日打電話、親身到學校查探仔女近況，甚至要求見教授，坦言校方都係為咗釋除家長疑慮，希望舉辦完家長日，家長排隊嚟學校條龍冇咁長，佢自己亦唔使聽咁多電話喇。