中環出更：「和黃」咬耳仔 耐人尋味
代表十多個專業團體嘅香港專業聯盟尋日舉行午宴，邀請特首梁振英（CY）出席並就長遠房屋策略發言。今年六月中上任市區重建局主席嘅蘇慶和亦有出席，佢周不時同身邊人傾偈，其中同恒基執行董事黃浩明仲密密斟，後者更曾挨近蘇嘅耳邊「咬耳仔」添。
黃浩明稱只係傾閒偈
究竟蘇黃二人有乜密偈傾呢？黃浩明回應話同蘇都認識咗好耐，雙方只係傾下閒偈，冇乜特別課題。蘇慶和則自言好習慣市建局呢份工作，又話第時得閒可以打電話畀佢，似乎想以最開放態度做好各方溝通嘅工作喎。
喺宴會上，CY作為重要嘉賓當然坐喺主家席，佢左右兩旁分別係香港專業聯盟主席劉炳章同立法會建築、測量及都市規劃界謝偉銓。而講到香港未來建屋方略，運輸及房屋局局長張炳良、常任秘書長栢志高等人自然亦係座上客。屯門鄉事委員會主席何君堯尋日亦有現身，並以前律師會會長身份坐喺主家席，事後佢主動將CY發言英文版放喺自己社交網站上，又笑言依家自己係無事忙喎。
卓妮