鐵打的衙門，流水的官，一代新人換舊人係官場司空見慣嘅尋常事。昨天係二○一三年九月九日，呢一日又有新官上任嘞，今次換人嘅部門係律政司，職位叫做刑事檢控專員。呢一個職位好鬼死重要㗎，有權決定告邊個唔告邊個。
為咗令到大家方便理解，等功夫茶先介紹一下前後三任刑事檢控專員係何方神聖。第一個係江樂士，第二個係薛偉成，第三個係楊家雄。今次人事變動嘅係薛偉成離任，楊家雄履新。楊家雄原本係私人執業嘅資深大律師，今次新官上任屬於空降律政司。
好嘞，介紹完三個人嘅先後次序，咁就要講一講貫通三個人嘅一條主線，各位觀眾，香港第一貪官曾蔭權！
呢嗱嗱嗱，成件事係咁嘅，前特首曾蔭權卸任之前被東方報業集團獨家踢爆種種醜聞，貪遍海陸空嘅無恥行為大家都耳熟能詳啦。由東窗事發至今，廉署調查已經一年零六個月，律政司仍然未決定是否提出檢控喎。莫講話廣大市民引頸以待等到不耐煩，連身為前任刑事檢控專員嘅江樂士都睇唔過眼，簡直係不吐不快嗰隻。
於是乎咯喎，江樂士致函傳媒仗義執言，認為廉署調查曾蔭權一案已經十八個月，但係律政司仍未交代會否起訴，令人覺得難以置信。江樂士指出，法律制度本應保障刑事案件得到迅速處理，律政司呢種做法有損法律制度嘅聲譽。江樂士更加擔心，薛偉成會留低好多懸而未決嘅案件畀繼任嘅楊家雄，包括前廉政專員湯顯明案。亦即係話，若然薛偉成離任前未處理好曾蔭權及湯顯明呢對「絕代雙貪」大案，手尾留畀楊家雄係不合適嘅。
如果由功夫茶將江樂士嘅說話翻譯成通俗易明嘅語句，就係薛偉成唔應該將貪曾貪湯嘅蘇州屎留畀新任刑事檢控專員呀！
之但係好可惜，九月九日大風吹，移燈換櫈人轉人嘅時間已到，薛偉成不幸被江樂士言中，真係拍拍屁股走人之後留低懸而未決嘅一堆案件，包括未執好貪曾爛攤子。
咁點算好呢？貪曾案仲要拖到何年何月何日先至有個決定呢？學似江樂士話齋，律政司呢種做法有損法律制度嘅聲譽，聲譽一旦受損就好難修補o架喇，冇陰功！
事到如今，人走茶涼，冇理由繼續鞭撻已經離任嘅舊電池，惟有將關注嘅焦點從薛偉成身上轉向楊家雄。楊專員呀楊專員，麻煩閣下竭盡所能維護香港得來不易嘅廉潔形象，唔好任由貪曾之流破壞殆盡，必須盡快依法治貪。你知啦，香港嘅全球廉政排名已經向下滑落，若然再死拖爛拖落去，香港廉政死亡，你就係千古罪人嘞！