政情：茂論發展郊野公園 政府撲火

誇大面積 四成變七成

搵地搵到頭都大埋嘅發展局局長陳茂波，前日喺官方網誌提到，早前聽到有意見認為，由於土地供應緊絀，係咪可以否考慮發展郊野公園用地，仲話全港有成七成土地係郊野公園，係咪全部都唔可以碰、唔可以傾呢？此話一出，唔少環保團體同土地政策團體都表明反對。發展局尋日就發稿撲火，話陳茂波只係引述講座和座談會上出席者嘅意見，強調唔係代表政府立場，又承認網誌中刊登嘅數字有誤，郊野公園用地其實係佔全港四成土地而非七成。

陳茂波尋日全日龜縮冇露面，連累身處貴陽出席泛珠三角區論壇嘅行政長官梁振英幫佢解釋，話政府無改變郊野公園政策，環境局局長黃錦星亦被問到係咪發展郊野公園，佢話陳茂波只係轉達社會人士嘅意見，至於點樣平衡保育和發展，就要多聽社會意見。