政情：博鰲青年論壇 楊政龍擔大旗
菁英會每年一度嘅重點活動「博鰲青年論壇（香港）」尋日喺灣仔會展圓滿舉行。身兼菁英會執委嘅英皇集團企業行政主任楊政龍（Alex）今年「擔大旗」，出任論壇嘅籌委會主席，並於閉幕典禮中圍繞住創意作「壓軸」致詞。
籲港人用創意作貢獻
今年博鰲青年論壇嘅主題係「創意青年，創新亞洲：携手共創美好未來」。Alex喺致詞時話，香港嘅文化及創意如影音、電台電視、出版、電腦遊戲、互動媒體、設計、建築、廣告等範疇舉世知名，並於國際大賽中屢奪殊榮，可見港人嘅創意不容忽視。Alex表示，大家係時候利用自己嘅創意優勢，對亞洲區嘅文化、經濟及教育作出更多貢獻，以保持香港喺知識型經濟中嘅經濟地位。