政情：李文斌「環枱行」減肥
藝人胡楓曾自爆，每晚臨瞓前都會圍住床邊行個幾兩個鐘，所以身體到依家都仲咁健壯。理文造紙太子爺李文斌（Edmond）前日現身沙田馬場，驚見佢身形大縮水，肚腩失咗蹤，面頰都變尖咗，原來佢都係靠步行瘦身，不過唔係圍住張床，而係圍住飯枱急步行，短短個半月就瘦咗十七磅喇。
Edmond月前至「升呢」做公司行政總裁，仲以為佢因壓力大而暴瘦，原來佢由七月底開始見營養師減肥，之後開始每日飲兩點五公升清水，減少每餐澱粉質，再分別於午飯及晚飯後，沿住飯枱快走四十五分鐘，加埋剛剛好行咗一萬步。
為咗騰出午飯時間運動，Edmond寧願扒快兩啖飯，日子有功之下，佢由一百七十磅，減至依家一百五十幾磅，衫褲鬆晒要拎去改，不過佢話仍未滿意，希望再減多五磅。咁究竟有乜原因推動佢積極減肥呢？Edmond就話冇特別原因，只係覺得自己真係太肥喎。