政情：BSD辣到白鴿頭痛
立法會十月將恢復會議，預料除咗擴建堆填區成為爭議議題外，買家印花稅（BSD）都會好快恢復二讀。由於商界聯成一線企硬提出修訂，要求豁免港人公司繳納買家印花稅，據聞政府唔傾向讓步，反而向泛民撬票。最新消息係運輸及房屋局局長張炳良決定星期四勇闖民主黨（白鴿黨）黨團會議，游說白鴿黨支持政府。但我哋聽聞白鴿黨目前進退兩難，如果撐政府會好似好怪咁，但撐商界更怪上加怪，所以目前都未敢輕舉妄動歸邊。
張炳良「親征」游說
有白鴿黨中人坦白講，其實唔少白鴿人都覺得港人公司應豁免買家印花稅，否則好多港資中小企都要硬住頭皮交重稅，到時BSD就會殺錯良民。但黨內最近又有人話，由於今次修訂係由地產及建造界議員提出，如果白鴿黨支持修訂，好容易令人有「民主黨撐地產商」嘅錯覺，日後選舉時分分鐘會火燒後欄。無辦法啦，白鴿黨近期已成為驚弓之鳥，尤其係國泰包機豪遊事件，白鴿黨就被外界狂轟雙重標準，基本上佢哋每行一步都擔驚受怕，又驚呢個鬧、又驚嗰個鬧，所以就算有資深白鴿覺得修訂有理據，都唔敢貿貿然表態支持。
但作為擁有六票嘅大黨，唔可以模稜兩可，點都要快快趣趣定立場，所以白鴿黨黨團會議周四就會主力傾BSD，聽講張炳良知道白鴿黨舉棋不定後，立即要求出席白鴿黨黨團會議，仲講明有咩疑問都會一一解答，態度非常友善。難得張炳良大駕光臨，唔知經過周四後，白鴿黨會否支持政府呢？
當政府出招游說，不停向泛民埋手，同政府打對台嘅地產商亦唔係坐以待斃，消息指最近地產建設商會不停私下約見部分泛民直選議員，希望佢哋支持地產及建造界議員石禮謙提出嘅修訂，公民黨某大狀更成為落嘴頭主要目標，但消息指地產商無論點樣斟茶灌水，似乎都唔多奏效，原來公民黨嘅理由同白鴿黨一樣，都覺得商界提出修訂並非無理據，但一旦支持就猶如支持地產商，好容易被對手攻擊，所以如無意外，公民黨都會支持法案原封不動通過。