中環出更：貪湯失魂 炒車擦牆
前廉政專員「貪湯」湯顯明被踢爆豪花公帑買過千支紅酒、烈酒，又被揭任內瘋狂外訪，最終被立法會、廉政公署多路追殺，雖然佢擺出一副唔在乎嘅樣，但自從有消息話立法會帳目委員會報告快將出爐，報告可能對佢所作所為表示「遺憾」後，佢可能心緒不寧，尋日中午揸車去尖沙咀食飯時，簡簡單單一個泊車動作，佢都將部車擦埋幅牆度，唔通佢都知自己大難臨頭？
貪湯尋日中午時分，一支公揸車從西貢寓所外出，但佢似乎心事重重，一見大直路就踩盡油門極速飛馳，好似想將煩惱拋諸腦後咁。喺紅磡兜咗幾個圈，貪湯就揸咗去尖東華懋停車場，但心緒不寧嘅佢一邊泊車一路埋怨「啲位咁細o架」。
我哋上前問下佢點睇立法會帳委會份報告初稿，點知佢詐傻扮懵，只係話適當時會公布，然後一支箭咁落車走人，話自己約朋友食飯喎。不過唔夠幾分鐘，佢又轉個頭去攞車，好似唔知自己想點咁，佢精神萎靡咁上車，咁就出事嘞，一開車即時聽到「刮」一聲，左邊車身即時炒咗落牆邊，終於幾經艱難，至可以成功出車，之後佢揸車轉去京士柏三軍會食飯，全情都好似心有餘悸咁。
廉署總部招牌 拆剩「貪腐」
另外，尋日我哋行過北角廉署總部時，見到有幾個人拆緊廉署招牌，原來係廉署招牌甩色，所以要逐隻字更換。
最好笑係我哋見到工人拆招牌時，剛剛係拆剩ICAC最尾一個C字，呢個C字係CORRUPTION嘅縮寫，即係貪腐咁解，真係襯晒貪湯嘞。