港產官僚嘅最大特色係反應遲鈍，後知後覺，除咗涉及自己利益例如加人工不甘後人之外，永遠唔會主動做嘢，永遠都係唔踢唔郁。好簡單，蘭桂坊淪為人間妖域，罪案頻生，但幾時見過當局主動執法吖？冇吖嘛，次次都要傳媒踢爆，警方先至識做嘢，唔到你唔服。
呢，本報過去一個星期連續幾日深入報道，將蘭桂坊種種亂象暴露於光天化日之下，包括非洲幫、南亞黨、半唐番及鬼妹仔等勢力插旗搵食，販毒又有，賣淫又有，偷呃拐騙都有，搞到烏煙瘴氣，七國咁亂。警方高層如夢初醒，前晚派探員嚴厲打擊，結果大有收穫，除咗拘捕一名懷疑企街嘅菲籍「人妖」，仲喺附近截獲一輛毒品快餐車，起出部分冰毒。最搞笑係，呢名菲籍「人妖」被帶返警署途中居然發難反抗，飛腳踢毀警車車窗，證明蘭桂坊果然係妖孽為患，妖氣沖天，唔怪得被稱為人間妖域喇。
正所謂，遲到好過冇到，今次喺傳媒督促之下，警方終於肯採取行動，慢就慢咗幾拍，總好過乜都唔做。不過咁，執法最緊要持之以恒，唔好又係虎頭蛇尾，否則盞嘥氣嘅咋。係人都知，蘭桂坊嘅犯罪活動之所以禁之不絕，就係因為當局敷衍了事，打擊罪案次次好似做騷咁，大鑼大鼓做場大龍鳳之後就關人個關，又點可能撥亂反正吖。
正如有人話齋，香港假假地都係國際金融中心，每年有幾千萬名遊客慕名而來，蘭桂坊更加係唔少遊客必到之處，家陣變成生人勿近嘅人間妖域咯喎，除咗令遊客望而卻步，亦影響香港國際聲譽，講起都失禮喇。
嗱，睇見今日嘅「爛鬼坊」，好多人就會諗起上世紀五、六十年代嘅九龍城寨，當時嘅城寨係三不管地帶，乜嘢罪案都有，黃賭毒樣樣齊，正式係烏煙瘴氣。依家九龍城寨已經變成公園，一天都光晒，反而喺中環心臟地帶嘅蘭桂坊淪為九反之地，真係令人有一種時光倒流嘅感覺。唉，蘭桂坊金玉其外，敗絮其中，正正係成個香港嘅縮影，港產官僚究竟知唔知醜o架？
講嚟講去，香港最寶貴嘅核心價值始終係新聞自由。港產官僚渾渾噩噩，做嘢甩甩漏漏，全靠正義傳媒發揮第四權功能，為民發聲，揭露黑暗，督促政府改善施政，督促警方加強執法，香港先至唔會繼續墮落，蘭桂坊先至唔會繼續腐爛咋。老實講吖，如果香港冇咗新聞自由，如果連正義傳媒都噤聲，唔只蘭桂坊七國咁亂，成個香港都可能已經變成人間妖域咯！