政情：細個藝術盲 大個管西九
多項公職在身嘅孔令成，現時除咗係海洋公園副主席，亦係西九文化區董事局成員，但原來佢自細對文化藝術冇乜興趣。佢學過幾年鋼琴，但一直就唔鍾意練琴；佢會盡量避免睇粵劇，因為覺得粵劇好悶；當爸爸帶佢去睇「天鵝湖」芭蕾舞表演，亦唔太欣賞。不過，其實又真係好少男仔會欣賞芭蕾舞劇嘅，但搵個「藝術盲」做西九文化區董事局成員，會唔會唔係太合適呢？
孔令成今時唔同往日
原來孔令成已今時唔同往日，佢喺西九文化區管理局最新一份電子通訊，建議大家都要對藝術保持開放同好奇嘅心態。所以佢話依家會敬佩將樂器玩得出神入化嘅專業音樂家、覺得芭蕾舞劇「天鵝湖」好精彩，而且可以目不轉睛咁睇幾小時粵劇表演。
孔令成話，佢對西九文化區期望甚高，希望可以將藝術帶畀大家，而佢哋嘅使命就係提供完善嘅建設以支持最廣泛及唔同種類嘅文化藝術活動。除咗一流場地同先進配備，仲包括培育藝術人才、灌輸文化概念同知識，以作為社會嘅泉源。