政情：曾偉雄講形象 呻警隊受委屈
最近好多涉及警方執法嘅爭議，但有人質疑點解公務員事務局日前要向警隊頒發最佳公眾形象銀獎。警務處處長曾偉雄尋日出席香港警察學院結業禮時，就力撐呢個形象獎好有公信力，仲話：「我想同大家講一講形象究竟係咩一回事，今日陽光普照，我就無戴有色眼鏡，我睇綠色就見到綠色，紅色就見到紅色，但在座咁多位有啲戴咗太陽眼鏡，睇嘅顏色就唔一樣」，暗示外界唔好用有色眼鏡睇警隊。
指治安評價世界前列
曾偉雄仲力撐公務員事務局嘅評審工作嚴謹，話如果周邊治安良好，咁警察理應得到認同，獲獎係理所當然嘅，叫外界以平常心看待警隊獲獎。佢又話，有兩個國際級嘅調查亦反映香港警察服務同治安評價屬全球頭幾位，值得參考吓。另外，之前爆粗辱警嘅小學教師林慧思報稱收到刀片恐嚇信件，希望可申人身保護令。曾偉雄就盼林慧思盡快去警署落口供提供詳細資料，否則好難評估佢嘅人身安全係咪真係受到威脅。