行政會議成員鄭耀棠及八名唔同黨派嘅立法會議員，早前帶埋家屬接受國泰航空免費款待，豪遊法國接收新飛機，被批評涉嫌存在利益衝突，部分議員事後諗住捐錢就當冇事，好似鄭耀棠更加不肯認錯，完全係寬己嚴人，持雙重標準。有熟悉國泰嘅知情人士就話，請議員參加「收機團」已經舉辦咗好多年，但一直都冇人話過有問題，而係依家社會對議員同公職人員嘅期望變咗喎。
該名知情人士話，以航空公司角度去睇，舉辦「收機團」只係想善用資源，事關每一架新飛機由外國收回到香港之後，都須經民航處最後審批，先可正式用作商業用途，所以呢個係收飛機必經過程，本身並無任何嘅商業成分。
佢透露，以往除邀請議員收飛機外，仲會邀請學生參與，亦試過利用新飛機回程時運送捐贈畀慈善機構嘅圖書，總之務求唔好浪費呢一程飛機嘅燃油。
唔浪費燃油點會係一個請議員豪遊嘅理由。講到底，航空公司都係提供咗利益畀議員，如果單係去收飛機，為何要去五日咁多呢？當中仲要玩咗三日，以及點解要邀請埋議員嘅家屬參加呢？所以點講都講唔通啦。