政情：貪曾癡夢碎 港人受累
「貪曾」前特首曾蔭權爵士在任七年，從未積極開發過新土地建屋，放任樓價急升，連累新政府搵地搵到氣咳。近日有消息指政府會將貪曾早年預定做私立大學用地嘅粉嶺皇后山地皮，用作興建公營房屋。有新界鄉紳有感而發爆料，指早前流標嘅一幅大埔私家醫院用地，原來早喺貪曾剛上任時，已有地區人士建議用來起樓，點知貪曾妄想大搞六大優勢產業，招呼都唔打就攞咗嚟做私院地皮，白白令土地浪費五年寶貴光陰，香港人認真無辜。
一意孤行發展私院
貪曾喺○八年施政報告提出，預留一幅大埔地皮作私院用途，藉此支持佢提出嘅六大產業構想。但有鄉紳近日爆料，原來早喺貪曾宣布將呢幅地皮用作興建私院前，地區已有唔少聲音建議用來起樓，當時嘅房屋部門高官，更曾親自同地區人士落區實地研究視察，只係未決定用來起私樓或是公營房屋，可惜其後貪曾一意孤行要起私院。
雖然當時有地區人士之後向政府提出過反對起私院嘅意見，政府亦再派出高官落區視察，但最後到場嘅唔係房屋部門官員，而係時任食物及衞生局局長周一嶽，目的當然係睇吓點樣將幅地發展成私院啦。結果政府如期喺一二年四月刊憲將該幅地劃作私院地皮，並公開招標。
新政府要執爛攤子
不過，香港要發展六大產業，包括吸引內地同東南亞嘅有錢人來港睇病，查實只係貪曾發嘅一場春秋大夢，除咗吸引到大批雙非內地人來港生仔，搶晒啲香港媽咪嘅床位，香港嘅醫療產業根本發展唔起，最後招標結果一如所料以流標收場。負責幫貪曾收拾爛攤子嘅新政府，最近亦決定還原基本步，將呢幅大埔地皮撥番畀發展局用來起樓。
該名鄉紳又話，有傳當年貪曾做沙田理民府時經常被鄉紳「食住」，懷疑出名小器嘅貪曾一直懷恨在心，任內再無積極推動過新界發展，審批丁屋又歎慢板，仲將大批有發展潛力嘅新界土地劃作郊野公園同保育地，強搶新界原居民嘅財產。貪曾政府喺任期尾仲大力打擊新界村屋僭建，最終搞到包括貪曾自己在內嘅多名高官被揭僭建，害人終害己。