中環出更：工記係「蛇齋餅糉」始祖？
每逢選舉前夕，泛民主派同建制派都互相指控對方搞「蛇齋餅糉」拉票，但究竟邊個係「蛇齋餅糉」嘅始祖呢？工聯會（工記）前立法會議員鄺志堅就爆料講出其中一個版本，話工記早於七九年開始搞「蛇宴」聯絡會員。如果鄺志堅所言屬實，「蛇宴」至今已有三十多年歷史喇！
鄺志堅講歷史
講開工記歷史，原來有個人不得不提，呢個就係立法會議員譚耀宗（譚sir）。鄺志堅話，八十年代初，譚sir有份創辦首間工記業餘進修中心，又爆料話譚sir曾做過百貨公司櫥窗設計員，當年衣着打扮仲有啲潮喎。真係好難想像譚sir可以有幾潮。
鄺志堅爆完料，又講到九五年立法局選舉單議席單票制，當年被喻為「四大天王」嘅譚sir、陳婉嫻（嫻姐）、曾鈺成及程介南參選，但除咗嫻姐之外，其餘三人都輸晒。鄺志堅回想，如果當年「四大天王」中有兩、三個人勝出嘅話，九七回歸後嘅立法會選舉，地方直選就未必會引入比例代表制呢個選舉方式。
卓妮