中環出更：學做人態度 孫公撐通識
全球最大嘅香港鐘錶展早前喺會展開幕，多場名錶派對及晚宴接連登場，吸引城中名流齊出動。前教育局局長孫明揚（孫公）同太太鍾小芬亦現身「詩歌瑰麗名錶夜」派對上。孫公退休後一向迴避評論政事，但卓妮問佢最近有人提議將通識科由必修改為選修時，佢就一改低調作風，立場堅定話一定唔改得，事關通識作為主修科至可以逼學生哥關心身邊事物，培養下一代正確嘅做人態度。
好多議題值得學生關注
孫公咁撐通識列為高中必修科，唔係因為佢係政策催生者，事關佢話未做教育局局長之前，政策早已拍板，佢上任後只係貫徹執行。主張撤銷主修科目人士認為，試題涉及太多政治議題，孫公亦唔認同，強調除咗政治議題之外，仲有好多議題值得年輕人關注喎。
講番當晚派對，主辦機構太子珠寶鐘錶主席鄧鉅明及太太鄧宣宏雁成晚忙到冇時停，鄧太好友兼愛沙尼亞共和國駐港名譽領事林建康太太林黃寧艷（Lianne）及家姐劉黃寧達都有到場。Lianne話，暑假期間舉家外遊近兩個月，兩個囝囝臨開學前先至返港。咁囝囝咪要勤做「收心操」？Lianne點頭笑稱，佢自己個心都仲未返晒嚟。
當晚接力登場嘅「國際名表薈萃」晚宴，係鐘表展嘅另一焦點，業界空群而出，包括香港鐘表業總會主席區宇凡、前主席朱繼陶及太太朱鄧麗萍、香港表廠商會會長黎衍橋，仲有熱愛跑馬嘅名人馬主兼寶齊萊代理商曾國雄，佢笑稱，今日新馬季開鑼，未來有排忙，事關入場跑馬係佢第二份工喎！
卓妮