消防處近期屢爆醜聞，包括有多名消防員違反部門規定秘撈賺外快、喺消防宿舍對開馬路邊違泊私家車、又亂調機場救護車，令機場一度冇白車駐守，搵旅客性命安全較飛等。不過，消防處尋日竟然獲公務員事務局頒發最佳公眾形象獎金獎，真係令人不明所以。
尋日公務員事務局舉行二○一三年公務員優質服務獎勵計劃頒獎禮，負面新聞不絕嘅消防處竟然獲得最佳公眾形象獎金獎，真係出奇。而喺形象獎屈居消防處之後嘅警務處近年推出「一犬兩用」計劃，即要求巡邏犬「自我增值」，做到又巡邏又緝毒，因而得到一個「隊伍獎（監管／執行服務）」。
除咗紀律部隊，其他公務員團隊亦唔輸蝕，好似康樂及文化事務署就以「一統天下︰秦始皇的永恆國度」展覽獲得「隊伍獎（一般公共服務）金獎」，而天文台就因為同飛行服務隊合作偵測颱風而獲部門合作獎銅獎。