民建聯（民記）同公民力量（公記）呢對政壇好兄弟，自從喺去年立法會選舉倒戈相向後，兩兄弟關係已大不如前。好似前日沙田區議會發展及房屋委員會會議上，雙方更劍拔弩張，民記罕有掉轉槍頭，反對公記力撐政府調高該區公屋及居屋發展項目地積比率嘅建議。兩兄弟忽然鬼打鬼，莫非係選票作怪？
話說政府建議調高區內四幅居屋項目用地嘅發展密度，地積比率由原本唔多於五倍，調高至五點八倍，意味每棟樓起高約十層。原本建議獲「沙田執政黨」公記首肯，誰不知民記提出反對。民記彭長緯批評，房委會為咗起多一千幾百個單位而打破地積比率不超過五倍嘅常規，係「程序上錯」，要求擱置有關討論。
雖然民記嘅擱置建議最後被大比數否決，但呢場罵戰卻花咗兩小時，仲搞到流會，要等兩個月後再議。有區會中人分析，呢四幅用地嘅議席已分別由公記、新同盟等政團瓜分，相信無着落嘅民記寧願先擱置發展都唔益人哋。但區內亦有另一種講法，話四個屋苑項目最快都要一八年先起好，所以未必同一五或一六年兩場選戰有關，反而係民記擔心一旦支持加大地積比率，政府就會陸續喺沙田建屏風樓，最後居民就會入晒民記數。