政情：奮起反擊 強攻泛民
無官一身輕，好多前高官同公職人員離開政府後，講嘢都自由好多。繼前高官馬時亨前日炮轟民主黨（白鴿黨）對接受商界款待問題持雙重標準後，尋日又輪到前行政會議成員林奮強發炮，狠批泛民主派濫用制度，令政府高官同公職人員及其家人、以至社會廣大納稅人都受害，而且佢仲一次過不點名鬧晒白鴿黨、公民黨（大狀黨）、以及動輒喺立法會拉布嘅激進泛民三大派系，確係拳拳到肉。
廉政公署早前決定唔會就林奮強被指「偷步賣樓」事件檢控任何人，但林奮強最後仍以保護家人為由劈炮唔撈。其後特首梁振英（CY）不點名要求曾到廉署舉報林奮強嘅白鴿黨總幹事林卓廷，應該向林奮強公開道歉，但林卓廷就反指「道歉論」等同向廉署施壓。不過，林奮強尋日喺報章撰文，自言唔會期望舉報過佢嘅人同傳媒道歉，擺明暗寸白鴿黨、林卓廷同有關傳媒嘅道德標準低，先至對佢哋全無期望。
指議員拉布令市民受害
林奮強批評，近年部分政黨人士同傳媒發動「公審風氣」，經常對政府高官同公職人員未審先判，未搞清事實真相就口誅筆伐、亂扣帽子，包括以「疑似指控」將佢同家人直接當做罪人，不斷玩跟蹤，搞到佢連朋友婚禮都唔敢去，甚至佢八十幾歲嘅媽媽同十幾歲嘅囝囝都搞埋。作為「疑似指控」嘅「最大受害者」，佢誓言如果自己曾利用一啲「疑似指控」影響咗某人一家嘅日常生活，而最後又證實對方係清白嘅，佢一定會第一個走出嚟道歉。
對於林卓廷質疑「道歉論」等同向廉署施壓，林奮強直斥係不合常理，因為如果政府真係想就佢單案向廉署施壓，理應喺調查階段做嘢，無理由等到廉署宣布結案，先至嚟公開施壓咁戇居。
林奮強又盛讚廉署對佢嘅調查專業公正，但警告任何良好嘅制度，都可能會被別有用心嘅人濫用，除咗廉署舉報制度，仲包括有議員濫用立法會議事程序對長者生活津貼撥款「拉布」，有人就港珠澳大橋工程提出司法覆核，導致工程費上升六十多億元等，令廣大長者同納稅人受害。佢講緊邊啲議員同政黨，大家心知肚明喇。
林卓廷駁斥「自招罪嫌」
林卓廷傍晚發表聲明死撐話，如果佢嘅舉報係全無根據，廉署就唔會立案調查喇，反斥林奮強係「自招罪嫌」，無資格以「受害者」自居。如果林卓廷真係咁公正，唔該佢立即就其黨員何俊仁、涂謹申同單仲偕「自招罪嫌」接受商界款待嘅醜聞，拉橫額到廉署報案喇！