事緣民主黨觀塘區議員黃啟明早前被本報踢爆，違規租用住宅單位作為區議員辦事處足足八年，鋌而走險都係為咗慳番啲租金，但結果都係衰收尾。原來黃啟明早前向總署反映區議員租用議員辦難處，總署近日回覆話，明白部分地區冇公共屋邨，或者真係負擔唔起舖租，決定研究喺空置官地以貨櫃形式作為臨時辦事處。
轉區夠晒快 櫃車拖就掂
不過，要區議員屈喺個貨櫃內，冬天都還可以，但喺焗熱嘅夏天，肯定人都焗暈，仲要四出搵廁所解決，都仲未計自行駁水駁電，所以辦事處配套係一個好大嘅問題。但貨櫃辦事處都有好處，如果區議員將來想轉戰其他區，搬辦事處就夠晒快喇，用貨櫃車拖到其他區就搞掂，連裝修都慳番。