中環出更：沈祖堯拒做怪獸家長
依家開學唔止中小學生家長忙碌，就連大學生家長都忙埋一份。中文大學校長沈祖堯話，近年的確多咗大學生家長到大學參觀，甚至陪仔女返學，加上依家啲學生年紀較輕，又係家長嘅金叵羅，搞到啲家長好鬼緊張。沈祖堯仲話，曾經有醫科畢業生嘅家長向佢投訴，話做咩要佢個仔on call咁多個鐘咁辛苦，仲有媽媽幫仔女填入職申請表添！
由兩女自行選擇前路
不過，沈祖堯就誓死唔做怪獸家長，要畀兩個女兒多啲空間，由佢哋自己選擇將來嘅路，沈校長喺暑假就同太太帶埋細女去咗美加參觀大學，為細女下年升讀大學做好準備。點知參觀期間，撞正有班內地家長，認得佢係中大校長，於是捉住佢唔放，要佢介紹吓中大嘅學習環境，搞到佢好尷尬，擔心被當地嘅校長鬧佢踩場兼搶客喎。
雖然沈校長把口就話唔會好太過溺愛下一代，但查實佢非常愛錫兩個女，好似大女依家讀緊醫科三年級，有臨床問題唔明嗰陣，沈校長除咗會親身指導之外，仲會扮埋病人畀個女學習診治添。
卓妮